মুখ্য পৃষ্ঠা
06/04/2515:04
"জীৱনৰ চিঠি"
© ৰাজু কলিতা
স্মৃতিৰ পখিলা জনী উৰি উৰি পৰে
ডায়েৰীৰ পাতে পাতে |
কৰবী ফুলৰ হালধীয়া আবেলি বোৰ
তাহানিতে থমকি ৰৈছিল ল'ৰালিৰ
ধেমালীতে |
বুকুৰ কামিহাঁড় হিচাপ কৰি কৰি
জীৱনৰ আদিপাঠ পঢ়ি
সময় উৰি গ'ল স্মৃতিৰ পখিলা হৈ |
বাৰিৰ চুকৰ শিমলু-নাহৰ চাই থাকোতেই
জীৱনে মাত লগালে উজাই যাবলৈ হ'ল |
চিকিমিকি সন্ধ্যাত জোনাকী ধৰি
চোতালত জপিয়াই দুবৰি ভাঙি
সৌ সিদিনা যেন পাৰ হ'ল ল'ৰালি |
পিতাইৰ দুখৰ পোচাক যোৰ পিন্ধী
পদুলিলৈ উলাবলৈ সময়েই নহয় |
আইৰ আঁচলত বান্ধী ললো সংগোপনে
দুটামান প্ৰিয় শব্দ |
জীৱন আগুৱাই গ'ল দুখৰ অৰণ্যৰ মাজেৰে |
পথাৰৰ মাটি কেইডৰাৰ লগত
চিনাকি হোৱাৰে পৰা
কিতাপ বহী বোৰ ধোঁৱাচাঙত
গোপনে উঠিল |
সময় সলনি হৈছে শতিকাৰ পৰা শতিকালৈ
জীৱন সলনি হৈছে চোতলৰ পৰা পথাৰলৈ |
স্মৃতি বোৰ তথাপি বন্দী আজিও
,
আইৰ আঁচলৰ আঁৰত |
বৰপেৰাত লুকুৱাই থলে কোনে
মোৰ প্ৰথম প্ৰেমৰ চিঠি ?
চিঠিৰ ভাজতেই উচুপি কান্দিব
ল'ৰালিৰ সপোনে |
নিচুকাবলৈ আজি সময় নাই
ব্যস্ততাৰ অজুহাত লৈ উলটি নাযায় জীৱন
আকৌ লিখিম এখন জীৱনৰ চিঠি |
13/10/14
